Chi’est riccu e potente a su dirittu
De viver sanu e in serenidade
Su poveru in custa societade
Podet morrer de famine e de frittu;
Tocca su riccu e benid subìtu
Mortu o trattadu cun barbaridade
Ca sa ricchesa sua accumulada
Est sacra e deved’esser rispettada.
Su populu a su famine attidu
No est lezittim’a si ribellare
Est lezittim’a lu torturare
Mancari siet afflittu e famidu;
Su riccu devet semper rispettare
Est sacru e deved’esser riveridu
Si li toccas s’illezittima ricchesa
T’isparat pro lezittima difesa.
Su riccu dened semper sa resone
Finas cann’ad su poveru insultadu
Chi l’ad angheriad’e isfruttadu
Umiliad’in d’onz’occasione,
Precariu e trattadu che coglione
In su tribagliu ischiavizzadu
Lezittimadu dae su podere
Faghet e minat tott’a piaghere.
Pensenne-bei ratristat su coro
C’atera cosa peus no binn’ada
Su riccu enid trattadu che tesoro
Su poveru che merce avvariada
Su riccu tenet su valore e s’oro
Su poveru de lama ruinzada
Sa sociedade de su fari fari
Inue contat solu su inari.
Gonariu
Commenti recenti