Poesias

A Gramsci

Cando vido sa ruja bandiera

Gramsci, mi venis a su pessamentu;

ca tue in su prus duru patimentu

l’as innalzata orgogliosa e fiera;

cantu prus acanita it sa bufera

pius forte it su tuo sentimentu,

e ses mortu pro cussa concuista

torturatu in su carcere fascista.

Primu ‘e maju

Oje semus de nou in primu maju

chi venit semper d’un’annu a distanza

pro aunire tottu in fratellantza

su pastore, s’artista, s’operaju

e fachet ispaventu a s’usuraju

chi non cheret s’umana uguaglianza.

E totu cantos sos travagliatores

Gridan: “abassu sos irfrutatores”

A sos guerrafondaios

Nois a sa terribile mineta

Totu sas forzas nostras oponimus;

facher gherra a nessune non cherimus

si no chin totu una pache perfeta.

Gherra contr’a sa gherra bos fachimus

In totucantu su globo terreste

e-i sos generales de sa peste

chin s’arma de sa pache distruimus.

Pro chi chin limba diferente e veste,

innaltzamus un’unica bandera;

ed est contra de vois barriera

su partigianu ch’in totue b’este.

Sa morte, sa tortura, sa galera

A nois no nos fachet ispaventu;

su ostru formidabile armamentu

no est àtera cosa che chimera.

Non semus viles in cumbatimentu,

s’a cussu puntu estremu nos vatìtes;

e-i sas armas chi vois tenites

sono sas nostras in cussu mamentu.

Impossibile cosa pretendites,

criminales de gherra, carnasseris,

d’America e inglesos banchieris:

suta sa nostra bandera rughites;

e de cannones sos baratieris

chi in sa gherra achites interessu

e leates su populu pro fessu,

brutos piratas e masnadieris.

Bivat sa pache; bivat su progressu.

Bivan sos sacros diritos umanos.

Bivan sos coragiosos partigianos

Chi sas ordas fascistas an’arressu.

Nennezzu Zizi Lùvula

Su neoliberismu

Custas otavas fato adagiu adagiu

Pro sos problemas non perder de vista

Su pòpulu vivenne est a disagi

Ca est perdinne donzi concuista

Colpèvole est su mercadu selvàgiu

Fizu de su podere liberista

Ofennet e umilia sas persones

Fatènnelas vivere de illusiones.

Custu sistema chi est tantu abbantadu

dae sos meres de su capitale

su populu in s’abbissu ch’at betadu

azunghinne a sos males solu male

su pòveru ant sempre umiliadu

dae zennarzu finas a nadale

issos s’atatant, si prenant sas buzas

E a su pòveru daent sas prafaruzas.

Sos politicos mafiosos

Chin sos povero usant sas minetas

Chin ofesas, insultos e ricatos

Promitint postos bellos e adatos

Bastet chi fetan sas marionetas

Lis daent sa papighedda in sas gavetta

Los còmporant a prèsiu e baratos

Chin arroganza e fagher prepotente

A bassu costu còmporant sa zente.

Gonariu Tilocca Burgos

MRAS

Sìentzias de lotta in MOVIMENTU

De cumpanzos unitos pro s’idea,

Ki tocat de alleviare su turmentu

A unu munnu de dolore e de pelea.

Prontos fachenne RESISTENTZIA

Kin su poveru ki est semper in gherra,

kin s’ispera de una nova esistentzia

pro s’omine in d’onzi zassu ‘e sa terra;

Kin s’idea ANTICAPITALISTA

Ki los movet cumbintos in s’intentu:

su Capitale est primu in sa lista

ki d’at a s’omine miseria e patimentu:

Sa cundièrra la cuminzan in SARDIGNA

Ca est su locu issoro ‘e naskitura,

ma da pican inartu de insìgna

sae su munnu intrèu k’est in tristura.

Migrantes

In sa pedhe ti brujat su sudore

E istratzos ti carraglian sa carèna,

dae sa vita isètas su lucore

ma as-solu de tratzare sa catena,

ca su mère vile sfruttatore

ti garrigat de trìulos e penas

e si provas a gruspire su velènu

ti narat: “kietu ses solu can’anzenu”.

Su proffitu

S’omine at imbentatu su proffitu

pro ponner s’esistenzia in sa billassa,

ki est zazatu e kie tropp’amittu

e kie de mercanzia ne prenat cassa;

Gherras, martorias e cunflittu

pro vacher de risorsas manu bassa,

e distingher gai s’isfruttatore

Dae su mìseru, poverittu servitore.

Nikola

Dae sa Mundana Cummedia

Ecco comente tra sa razza umana

Sos furbos su dominiu han leatu;

e cun barbaridade ant guvernadu,

a cantu sas istorias mi naràna

bendiana sa zent’e comporàna

a usu ‘e bestiamine domadu! .

E da sos populos tottu sunt istados

Timidos e che deos adorados.

Tand’est chi parziales sunt bennidos

delizias mundanas e dolores,

e poveros dae s’epoca e segnores

in su mundu si sunt distinguidos.

Ecco s’origine de duos partidos:

Meres de cumandare e servidores

E dae tando chie arat e zappat

E chie senza sudore pane pappat.

Bore Poddighe